Kon Taalmaatjes Boneiru a kuminsá

“Komo antropólogo mi a hasi un investigashon na 2016 di situashon di imigrantenan na Boneiru (sin paspoort hulandes). Na e momentu ei mi mes tabata bibando pa un aña na Boneiru. Loke a hala mi atenshon ta, ku hopi problema bou di imigrantenan tabata relashoná di un manera òf otro ku idioma: vulnerabilidat na trabou; no por yuda yunan ku nan tareanan di skol; no sa unda por akudí na momentu ku nan tin problema. Personanan ku tabata independiente i aventurero, a bira dependiente debí na barera di idioma ku nan a topa. Aparte di trese e problema aki dilanti, mi kier a hasi algu tambe.

Gran parti di imigrante na Boneiru ta di habla spañó i tabatin nesesidat prisipalmente di siña hulandes. Despues di un yamada a resultá ku hopi hende di habla hulandes tabata entusiasmá pa duna un man i tanten nan ta amplia nan abilidat lingwístiko. Mi tabata trese maatjes huntu i tabata guia e enkuentronan na un sentro di bario. Durante di e enkuentronan e partisipantenan por a praktiká huntu i siña for di otro. Na final di 2019 mi a haña invitashon pa presentá Taalmaatje Bonaire pa ‘Appeltjes van Oranje‘. Esaki no a kondusí solamente na un premio di enkurashamentu pero el a kondusi tambe na mi deseo pa profeshonlisá e proyekto i hasié stabil pa den futuro.

Pa esei mi a buska yudansa. Ku miembronan di direktiva i boluntarionan dediká a funda ‘Stichting Bonaire Connect’ na komienso di 2021. Despues di esei a otrogá nos supsidio for di Samenwerkende Fondsen Cariben pa profesionalisá e proyekto spaño-hulandes. Den 2022 nos a risibí un añadidura riba esaki danki na Entidat Públiko Boneiru.

Semper nos tabata ke inkorporá papiamentu den e proyekto. Ya ku esei ta e idioma di nos isla. E deseo aki por a bira realidat na fin di 2022 danki na un supsidio di e Ministerio di OCW (Tel mee met Taal) i un añadidura riba esaki di Prins Bernhard Cultuurfonds Caribisch Gebied.

Mi ta spera ku den futuro Taalmaatjes Bonaire por amplia ku mas idioma. Poblashon di Boneiru ta diverso i ta krese lihé pa medio di imigrashon. Nos por retirá den nos mes sosiedat i aseptá ku nos ta alehando for di otro. Òf nos por krea kontakto, deskubrí kiko nos tin komun i na kaminda siña algu for di otro”